中環出更：梁美芬想調低醫療券門檻
立法會尋日討論有關長者醫療券嘅質詢，有唔少議員認為合資格人士年齡應由七十歲下降至六十五歲，更有議員話長者係為社會經濟貢獻先搞到病痛纏身。不過，連六十五歲呢一關都未達到，議員梁美芬竟然提出降低至六十歲或以上，唔通佢為自己五年後滿六十歲未雨綢繆？
70歲降至60歲
食物及衞生局局長高永文回應調低年齡訴求時話，按照政府統計處推算，二○二○年時年滿七十歲同六十五歲嘅人口分別為九十三萬及一百四十萬人，係現時使用醫療券人數嘅一點五倍及兩倍，所以增加醫療券金額或調低合資格年齡，都會令政府財政負擔大幅增加，如果真係調低年齡，當局都會爭取額外資源。
不過，梁美芬反駁，指醫療券係畀有需要嘅人士使用，認為需要考慮擴大範圍，提出下調至六十歲至六十四歲嘅已退休但無買醫療保險嘅人士。咁講法，相信佢唔係為咗自己。高永文話，醫療券制度首先要優化到六十五歲，才可以進一步下調，但無論如何點都會有條底線。依家連第一關都未過，梁美芬咁快就跳到六十歲，會唔會走得太快呢？
卓妮