中環出更：品牌授權拓商機 不同「梵」響
經濟不景，商界莫不諗計突圍而出，早前就有個「梵高‧雋永時光」藝術及時計展，一幅幅梵高傳世名畫融入咗唔同商品設計之中。朗智（品牌）董事總經理黃僖偲從事品牌代理及授權近三十年，佢話見過好多自創品牌搞到血本無歸，試過有人投資咗幾億元，結果三年就玩完。所以攞現成嘅名牌做生意係一個唔錯嘅選擇，其中藝術文化可睇高一線，事關無論經濟好定唔好，對藝術嘅影響好微。
家族生意做船舶設備貿易嘅李霆鈞（Dennis）都好贊同，所以佢創立全球第一個以梵高為主題嘅美食品牌。Dennis自言好鍾意梵高，但係梵高嘅畫作多達二千一百幅，廣為人知嘅只有八百六十幾幅。另一方面，Dennis覺得高檔咖啡、茶及餅乾嘅禮品市場有得做，所以佢就以梵高較少人知嘅畫做包裝，然後用靚木盒、鐵罐取代紙盒，方便用家食用完之後將名畫變身首飾盒或其他用途。
名畫變身包裝盒掛鐘
Dennis仲打算開設梵高體驗館，入邊齊集各類獲授權嘅梵高產品，例如鐘、花及食品等。不過，香港租金昂貴，要搵到適合地點唔容易，所以Dennis會先喺上海開業。當日亞太文化創意產業總會榮譽會長馬桂榕都有到場，支持代理梵高鐘嘅香港鐘表業總會副主席徐珊雯（Elise）參展。Elise話，今次展覽有唔少人查詢售價數十萬元嘅掛鐘，可見鍾意藝術嘅人真係唔受經濟不景氣影響。
卓妮