道德淪亡，世風日下，今日香港七國咁亂，怪事特別多，有人居然出書教授殺童烹屍，而且好似無王管咁賣通街，你話呢個究竟係乜嘢世界？
件事係咁嘅，有兩本聲稱「探討暴力及色情事件」嘅小說，專門講述殺人、食人及性虐等血腥殘酷內容，其中一本更詳細引述一篇教授烹煮女童嘅文章，令人毛骨悚然。更得人驚嘅係，呢兩本書居然喺書店公開擺賣，而且冇膠袋密封及任何警告字句，仲成為「超人氣書籍」添。事件引起家長恐慌後，出版商至要求書店停售及回收，直至加上警告字句。其實正如淫審處審裁員協會主席葉興國話齋，小說內容「極度惡心」，如果呈上淫審處評級，「一定係第三類別」，意味不得發布，即使包膠袋亦無補於事。
監管當局又點講呢？電影、報刊及物品管理處聲稱已收到百幾宗針對該兩本書嘅投訴，主要涉及過分渲染血腥暴力及變態內容，該處正就兩本書嘅發布展開調查，如發現違例情況，不排除提出檢控喎。
所以話，港產官僚永遠都係反應遲鈍，後知後覺，呢兩本書分別於去年六月及近月出版，已經喺書店賣咗一段日子，當局平時懶得巡查，家陣出事至賊過興兵，遲唔遲啲吖？最離譜嘅係，有市民去年八月已就其中一本血腥小說向當局投訴，得到嘅答覆居然話本書內容冇問題喎，問你服未。咪話功夫茶踢爆吖，當局根本冇審查過相關小說，見到有市民投訴，咪隨口噏當秘笈囉。
見微知著，從呢件事就知道淫審制度幾咁混亂。根據《淫褻及不雅物品管制條例》，作者、印刷人可主動將出版物呈交淫審處評級，而電影、報刊及物品管理處亦會派員巡查書店及報攤，將懷疑違例物品送交審裁處評級，甚至轉介警方提出檢控，觸犯相關法例最高可被罰款一百萬元及監禁三年。嗱，法例就喺度喇，可惜當局懶得監管，加上評級標準混亂，搞到烏龍百出，笑話多多。
最匪夷所思嘅係，淫審制度居然成為親疏有別嘅政治工具，淫賤傳媒犯案過百次亦獲輕輕放過，而正義傳媒就動輒得咎，連國際藝術作品「大衞像」都被視為不雅，甚至曾出現三重標準嘅鬧劇添。港產官僚不學無術，應禁嘅唔禁，唔應禁嘅就亂禁，唔怪得血腥小說賣通街喇。
話時話，近年香港發生多宗殺人烹屍慘劇，你估唔係有樣學樣咩。當局任由烹童小說賣通街，令人惡心仲係小事，教壞兒童至係大件事，再咁落去，香港遲早成為血腥之城都似。