殷海光曾說：自古至今，容忍的總是老百姓，被容忍的總是統治者。此刻老朽要說，香港官場，容忍的總是納稅人，被容忍的總是混帳的高官。不是嗎？政府不久前宣布，現任民航處副處長李天柱將於五月十九日起，接替於同日開始退休前休假的羅崇文出任民航處處長。
李天柱唯一可以安慰的，係佢做得再差，當亦不會衰得過羅崇文，而唯一要頭痕嘅係，前度留下唔知幾多蘇州屎等佢執拾，尤其嗰個千瘡百孔的新空管系統下月起分階段啟用前夕，羅崇文就拍拍蘿柚，揮一揮衣袖，袋走千萬元退休金瀟灑而去！呢個關乎千萬乘客安全嘅系統，睇怕李天柱真要打醒十二分精神，求神拜佛唔好有乜甩漏！
香港政府管治不善，從羅崇文身上可以見微知著也。嗱！多名立法會帳委會委員，於去年六月就新空管系統延誤啟用提交報告，當中狠批佢疏忽職守；其實本報自二○一三年起，已多次踢爆民航處連串大花筒及管理不善醜聞，包括濫用千萬元公帑將新總部大樓變身「豪華娛樂城」；本報發揮第四權，連番報道觸發審計署深入調查，狠批民航處「十宗罪」，立法會政府帳目委員會亦以「痛斥」譴責之，可惜，冇神經政府依然任由佢尸位素餐、姑息養奸，試問香港公務員如何打造高效清廉的形象？
政務司司長林鄭月娥早前回應帳目委員會報告時，曾說不排除會有行動，然則，行動呢？難道又係「講咗當做咗」？諸葛亮說：賞罰不正，則忠臣死於非罪，而邪臣起於非功。賞賜不避怨讎，則齊桓得管仲之功；誅罰不避親戚，則周公有殺弟之名。
羅崇文退休，若然退休金冇扣減、長俸照享，則所謂「問責」已死，政府管治無能，昭昭明甚，再講甚麼管治高效、公務員辦事能力世界一流，徒惹有識之士恥笑！