政情：教院正名衝刺 泛民唔敢玩嘢
去年香港大學副校長任命引起軒然大波，亦令外界關注院校自主、學術自由問題，泛民主派更想取消由特首任資助院校校監制度。早前有學者建議藉香港教育學院（教院）將正名為大學，泛民可以就相關條例草案提出修正案，但教育界議員葉建源同大部分泛民議員都無提出修正案，只有一位議員作拉布式修訂。講到底，教院升格大學幾經波折，如果臨門一腳才落空，任何泛民議員都會淪為千古罪人。
教院升格為大學一事，教院師生可以話係等到頸都長，而教院好不容易先得到行政長官同行政會議批准授予大學名銜，正名為「香港教育大學」。因應立法會持續拉布，政府更特意調動議程，優先處理令教院得以正名的《二○一六年香港教育學院（修訂）條例草案》。不過，早前有大學學者竟然建議，泛民可以在教院升格大學時，趁機提出修改教育學院條例，取消特首成為院校當然校監，一旦通過，可以成為先例，令其他院校進行修例。
唔通過要等下屆處理
一眾泛民議員當然無睬呢位學者喇，只有一位議員因為拉布而就條例草案提出三項修正案，但被立法會主席曾鈺成以超出條例草案涵蓋範圍為由，不獲批准提出。葉建源話，教院由特首委任校委人數係眾院校之中最多，係有需要檢視，但如果涉及修訂，必定引起漫長討論，而今個立法年度只剩餘約兩個月，仲要撞正換屆，如果本年度通過唔到教院正名大學，就要留待下屆立法會先可以處理喇。
免「搞喎」件事 全部靜音
葉建源又話，佢喺教院教書多年，知道校內師生都希望可以將正名同院校管治改革分開處理，所以佢同泛民討論過，大家都有共識唔會就條例草案成立法案委員會，亦都唔會提出修正案；而校方亦已游說激進派包括人民力量及社民連議員支持教院正名大學。教院正名一事由運輸及房屋局局長張炳良任校長時開始爭取，拖到依家張仁良做校長終於轉入大直路，泛民「搞喎」件事又係咪擔當得起？難怪泛民都唔敢阻住地球轉，全部靜音喇。