曾考慮參選一二年特首選舉嘅立法會主席曾鈺成，尋日接受電台訪問時爆料，話當年曾有西環嘅人向佢表明，即使佢無意選特首，都唔希望佢太快表明唔參選，目的係霸住個位，趕走其他想參選嘅人。而喺佢舉行記者會宣布不參選後，隨即有人致電同佢講：「你唔選，咁你啲票係咪可以畀我呀？」
對於透露西環嘅指示，曾鈺成話唔知算唔算係洩露國家機密。佢又話，當年係「畀人出賣」，佢憶述當年有一班朋友要求佢參選特首，並要求佢考慮一個周末再作決定，表明「唔應承唔散」，所以佢承諾會「認真考慮」，點知翌日即被專欄作家嘅朋友將消息寫喺報紙上，所以佢惟有表明會積極參選，但其實並無真正打算參選。
曾鈺成又透露，由傳出佢考慮參選到宣布不參選短短十幾日，已有人搞黑材料，「有三個古仔關於我」並在坊間流傳，而三個古仔都並非無根據。一係借錢，因為佢婚後置業向細佬借錢；二係管理學校帳目混亂，因為佢管理直資學校時教育局的確曾不滿其帳目；三係身患重病，佢透露故友曾景安當時身患重病，要求佢幫手安排到廣州求醫，所以醫院登記有佢個名。
當黑材料流傳後，曾鈺成指「梁生打嚟話我冇你黑材料，唔會搞你黑材料」，但佢就唔知梁生嘅下屬有冇搞黑材料，坦言在消息傳出後短短十幾日，已體驗了選舉政治最黑暗的一面。
卓妮