中環出更：專資會拉隊 玩盡巴爾幹
香港專業及資深行政人員協會（專資會）每年都會組團去唔同地方考察，今年上半年已分別去過桂林及巴爾幹半島一帶地方，日前舉行晚宴分享遊歷。專資會理事、新華旅遊董事總經理楊章桂芝（Cindy）負責策劃十五日巴爾幹考察行程，各成員均大呼好玩，除咗發現斯洛文尼亞嘅溶洞同內地嘅有咩唔同外，仲見識到教堂門前大排長龍等足兩小時去告解。
專資會上月考察巴爾幹半島，途經斯洛文尼亞、克羅地亞、黑山、波斯尼亞、塞爾維亞等七個地方。Cindy話，當地一帶主要靠旅遊帶動經濟，所以接待特別熱情，掛住傾談仲差啲搞到趕唔切去下一個景點。一班會員憶起旅程時仍相當興奮，話當地溶洞無七彩顏色燈光照射，仲可以坐火車穿梭；由於洞內有天然音效，間中真係有人會喺洞內開演唱會。
至於創會會長容永祺、副會長劉展灝及理事洪為民，雖然未能跟大隊一齊去巴爾幹半島，但容永祺早幾個月都去過當地一次，參與當地一個二千幾人嘅保險界會議，期間仲喺布達佩斯嘅著名景點漁夫堡度見到有人表演樂器。由於佢中學時代學過小提琴，梗係忍唔住技癢借咗個小提琴嚟拉兼留影啦。劉展灝就話十年前試過因為工作緣故，三星期內去咗兩次巴爾幹半島。
盧偉國山東古城樓梯賞月
當晚仲有前會長盧偉國分享去年及今年四月帶團到山東及桂林，與會長陳紹雄及副會長梁廣灝難忘有晚喺山東適逢月圓之夜，佢哋住喺棗莊台兒莊古城，喺古城二樓嘅狹窄樓梯賞月，但笑言抬住個行李上樓梯真係好辛苦喎！
卓妮