阿邦是一間科研公司的工程師，他最近被委派專責一項新的科研項目。阿邦本來信心十足，但在研究過程中，忽然出了問題，令進度停滯不前。阿邦因而感到很大壓力，十分擔憂。
在一次聚會中，阿邦碰到舊同學嘉琪。嘉琪是臨床心理學家，她發現阿邦面容憔悴、心事重重，便問道：「阿邦，你成晚心不在焉，咩事呀？」
阿邦：「唉，最近工作上出咗啲問題，搞到無晒心機，好大壓力。」
嘉琪：「你畀咁大壓力自己，會好影響你嘅身心健康o架。」
阿邦：「冇事喎，我依家行得走得，無病無痛，仲好健康。」
嘉琪：「我講緊你嘅精神心理健康呀。你成日畀咁大壓力自己，會好容易患上精神病或者情緒病o架。」
阿邦：「我最近的確因為擔心工作進度，而成日覺得好徬徨同焦慮，搞到好難集中精神。」
嘉琪：「其實有適當工作壓力都未必係壞事，只要能夠認定壓力對工作有幫助就可以減少不安情緒，令工作有更好表現。另外，你亦可以透過建立正向心理來提升個人心理健康同抗壓力。」
阿邦：「咁點先可以建立正向心理？」
嘉琪：「建立正向心理嘅秘訣就係多啲笑，令到心情保持愉快；多分享，與家人及朋友分享自己嘅情緒同埋感受；多感謝，學習欣賞及感謝身邊嘅人與事；多角度思考，嘗試發掘事情美好嘅一面；多做運動，幫助減壓，以及多些幫助別人，提升個人快樂嘅感覺。」
阿邦：「哦，同你分享完，真係輕鬆咗好多，多謝晒！」
職業安全健康局
www.oshc.org.hk