政情：陳恒鑌寧去公院不信私院
本港私家醫院收費貴，照計服務質素都好好，但立法會議員陳恒鑌（Ben）就話，佢嘅家人凡有大事入院，都一定會揀公立醫院喎。佢舉例話，早前囝囝出世，太太都係去廣華醫院，原來當時佢太太胎盤前置，怕會難產同失血過多，風險好大，所以都係去公立醫院穩陣啲。
感激護士幫手湊B
阿Ben話，私家醫院無急症，亦無咁多醫生同器材，血庫仲要好細，如果佢太太失血過多，怕私家醫院會搞唔掂，加上私家醫院每日計錢，真係好貴，公立醫院就平得多喇。佢又話，雖然公立醫院嘅資源唔夠，但醫護人員都相當專業，仲大讚醫生好有心同好細心，護士亦好有愛心，夜晚會幫手湊囝囝，等太太有得休息吓，如果朝早搞唔掂時，又可以拜託護士幫手。
最近阿Ben嘅媽媽膝蓋退化，都係去荃灣仁濟醫院，強調屋企人都係要排隊，排咗足足三年，但佢全家人始終都係對公立醫院比較有信心啲，不過當然希望無病無痛就最好啦。