政情：陳光明遊北韓嘗電油燒蜆
中華總商會會董陳光明（Johnny）早前跟晉港青年國際交流促進會到北韓，與當地青年進行交流活動兼觀看平壤馬拉松。佢透露同三年前到北韓嘅經歷有唔同，尤其食物方面更加令佢印象深刻，好似以前用火水燒蜆，依家就改用電油燒蜆，啲蜆食落有陣電油味。
講起好多人都話去到北韓冇啖好食，Johnny就認為另有樂趣，今次佢再去當地，煮蜆方法已經唔同咗，當地人直接將電油淋落啲蜆度，之後一點火就係咁燒，睇到佢目瞪口呆。雖然最後啲蜆食落有陣電油味，但佢就覺得別有風味，淨係睇都夠晒精彩咁話。佢哋仲去咗妙香山河邊野餐食泡菜，絕對係賞心樂事喎。
今次除咗去睇馬拉松，Johnny仲去咗參觀當地嘅少年宮，與當地學生交流及了解佢哋學樂器及書法等興趣班嘅情況，又送咗啲文具畀佢哋。不過，最令佢驚訝嘅係，三年前曾經見過嘅一名駐守三八線長官，對方竟然一眼就認出佢，仲同佢傾咗幾句偈添！