政情：各黨派當吳得掂透明
教育局局長吳克儉（吳得掂）民望長期包尾，做乜都唔得掂，包括剛上任時強推嘅國民教育風波，到近期小三全港性系統評估（TSA）事件，以至最近嘅一帶一路獎學金計劃，都備受批評，就算他提出微調計劃，一併資助香港學生去一帶一路國家求學，但都係無人騷佢。其實吳得掂呢個做事無能、只懂旅行的局長，一早已經被泛民主派及建制派當透明，將他徹底邊緣化，只係未能成功拉他下台。
乜都唔知遭嫌棄
吳得掂搞邊樣衰邊樣已非新鮮事，最弊他連拉關係都唔多掂，建制派看見他都眼冤。近日聽聞工聯會（工記）幾乎已經同現屆全部問責局長食飯，但就偏偏無約吳得掂。據聞吳得掂都有約過工記，但慘食「檸檬」。正所謂事出必有因，據悉工記嫌棄吳得掂乜都唔知，有事要商討都寧願搵副局長楊潤雄。有工記中人透露，他們上月有人想約吳得掂討論職業教育事宜，點知吳得掂就話唔係佢負責，所以惟有找楊潤雄。工記稍後都會搵教育局官員討論生涯規劃事宜，但就已經預咗會飛起吳得掂。
建制寧搵楊潤雄
其實吳得掂被飛起已非首次，早前身兼立法會教育事務委員會主席嘅工業界議員林大輝同幾位議員去咗葵青區了解當區火柴盒校舍面對嘅問題，都係楊潤雄出動。視察完校舍之後，大輝仲同楊潤雄、校方代表組成三方會議，繼續探討點解決校舍問題，完全無預吳得掂。連建制派都當吳得掂無到，泛民更加唔使講。民主黨（白鴿黨）今年的周年晚宴，不少局長都獲邀請，但就無邀請吳得掂，原因好簡單，因為白鴿黨曾經要求佢下台囉！
民政事務局前局長曾德成早前同公務員事務局前局長鄧國威被辭職，政圈唔少人都認為，要「炒魷」第一個應該炒咗吳得掂呢個做事無能、只懂旅行嘅局長，可惜他行運「大難不死」。不過，現時他已經被邊緣化，大可繼續專心做「旅行局長」喇，或者每月睇夠三百本書都仲得！