中環出更：慶賀母親節 名人盡顯心思
今日係母親節大日子，有團體趁佳節前夕大搞公益活動，為弱視人士扮靚靚，推廣愛心關懷同傷健共融嘅訊息。活動不乏名人出席，佢哋更精心籌備母親節活動，好似莎莎國際太子女郭詩慧（Melody），會喺莎莎第一間舖嘅舊址間餐廳訂枱，邊食邊歎海景之餘，仲望到公司現有物業。Melody希望呢個安排能夠為媽媽送上回憶，更預備小禮物，真係夠晒有心思！
同場嘅英孚教育執行副總裁張雅麗（Carol）亦都預留時間食飯慶祝。佢話，以前會親手做小手作送畀媽媽，好似絲帶花、番梘天鵝等等，但由於現時工作繁重，惟有送花同食飯當慶祝喇。咁Carol又點同兩個囝囝慶祝呢？佢話驚喜應該由囝囝預備，但就估計佢哋已經同爸爸夾好，密密畫緊賀卡，仲講笑話近日想入囝囝房都被趕走，睇嚟佢會有份神秘禮物喎！
鄭明明自爆鍾意收睡衣
CMM國際集團董事長鄭明明都會同家人過母親節，但佢話母親節禮物只要係女兒送就一定鍾意，呢位媽媽果然易氹喎！佢更自爆最鍾意收到睡衣禮物，因為平時工作太忙碌，一定要有套舒適嘅睡衣幫助入睡，否則一定唔夠精神，所以屋企嘅睡衣多到數唔晒。
卓妮尋日喺沙田馬場亦見到中華總商會常務會董楊華勇，佢話今日會三代同堂食飯。雖然佢會乖乖賀節，但其實佢十幾歲時曾經激到阿媽嬲咗佢足足半年，更狠心將佢所有課外活動都中止！不過，年少嘅楊華勇唔知驚，反而開心唔使學琴同打波，到大咗先識得後悔，睇嚟佢已經明白媽媽當年有幾咁用心良苦喇！
卓妮