「賞罰之政，謂賞善罰惡也。賞以興功，罰以禁姦，賞不可不平，罰不可不均。」呢啲係古人嘅教誨，即係話賞罰必須分明。可惜吖，港府反其道而行，不分是非，賞惡罰善，唔怪得施政烏龍百出，民望跌到趴街喇。
好似民航處處長羅崇文咁吖，本月十九日開始退休前休假，除咗一次過袋走一千二百萬元退休金，每個月仲可以攞七萬幾元長俸，都咪話唔和味。其實係人都知，羅崇文任內醜聞多多，早就淪為過街老鼠，除咗多次被審計署炮轟，立法會帳委會更以最嚴厲嘅字眼「痛斥」，搞到連公務員事務局嘅人事任免公告亦唔敢按慣例讚揚佢任內嘅「貢獻」，你話嘞，咁嘅庸官都可以全身而退，袋袋平安，仲有冇天理吖！
講開羅崇文嘅臭史，真係一匹布咁長，最經典莫過於將民航處新總部大樓打造成超級娛樂城，富麗堂皇不特止，而且加建豪華浴池及跳舞室等，據講係因為佢太太熱愛舞蹈喎，咁仲唔係假公濟私？仲有吖，羅崇文臨走都要出醜，佢上個月向飛行總會租借直升機「遊機河」，懷疑飛行程序出錯，導致直升機引擎損毀，佢唔止冇按規定向民航處提交報告，仲將責任推得一乾二淨添。
最離譜嘅係，民航處斥資十五億元引入嘅新空管系統，問題多多，性能仲差過舊系統，以致一再延遲啟用，下個月至分階段投入運作，究竟靠唔靠得住，根本冇人知。羅崇文拍拍屁股走人，留低呢個爛攤子，萬一出事都唔知邊個孭鑊。一節見則百節知，羅崇文不務正業，得過且過，唔怪得民航處烏煙瘴氣，醜聞多多！
有立法會議員就講得啱嘞，羅崇文退休唔代表可以甩身，帳委會將追究到底，就好似前廉政專員湯顯明咁吖，卸任後咪一樣要到帳委會作證。亦有議員指羅崇文任內採購新空管系統有以權謀私之嫌，可能涉及利益輸送，唔排除向廉署舉報。
冇錯喇，對付呢啲庸官劣吏絕對唔可以手軟（口架）。港府施政混亂，民望低殘，再唔整頓吏治，執正嚟做，管治權威遲早破產嘅咋。唔怕唔識貨，最怕貨比貨，美國密歇根州最近爆發鉛水風波，當局速速追究責任，最少已有三名官員被起訴，反觀香港鉛水事件搞到滿城風雨，人心惶惶，結果居然冇任何官員被問責，問你服未。
講到呢度，大家應該知道點解香港頭頭碰着黑，港府渾渾噩噩，敷衍塞責，唔撞板至奇吖。所以話，國家之敗，由官邪也，香港之所以搞成咁，咪就係因為官僚無能兼自私囉！