信悅兒情意滲透

天橋上嘅模特兒總係令人有種冷冰冰嘅感覺,寫真模特兒就唔同喇,透過誘人嘅肢體動作及火辣身材吸引大家嘅眼球。而內地嫩模信悅兒不但完美糅合呢兩種元素,仲散發出無比熱情,令男人意亂情迷。

可塑性高

嚟自遼寧瀋陽嘅22歲信悅兒,英文名Paris,仲有個與別不同嘅暱稱,就係叫做葉赫那拉信悅,究竟佢同清朝滿族八大姓之一嘅葉赫那拉氏有乜嘢關係呢?真係唔知,但可以肯定嘅係佢生得高挑,前凸後趷嘅身材成為大家嘅焦點,尤其係36吋嘅上圍,相當火辣,加埋一對修長白滑嘅美腿,足以令男人心跳加速。

其實悅兒早就喺私模界頗有名氣,及至上年才正式加入寫真界,人氣更係極速飆升,除咗喺潮流、男士、汽車等雜誌中亮相外,又以車模身份喺賽車場及車展中登場,同時被廣告商睇中,拍攝唔少廣告,而佢外冷內熱嘅演出,可塑性甚高,深受觀眾歡迎。

公開瘀事

講到悅兒嘅性格,咪以為佢英文名叫Paris,就係一個好浪漫嘅女仔,事實係佢性格可愛,仲好大頭蝦添!話說上年3月佢去外地旅行,點知畀人偷咗銀包,結果差啲冇錢買唔到機票返屋企;事隔三個月,佢出席聚會時,又被人偷咗銀包,真係陰功豬!當佢喺微博同大家講出呢兩件事,就畀人取笑佢大頭蝦。事實上,大部分模特兒為咗保持形象,好多時都唔敢講自己啲瘀事,好似悅兒唔介意公開話畀人知,任人取笑,的確少有。

除咗份人夠真同大懵外,其實佢嘅性格都幾任性。點解咁講?話說佢曾經想剪一個劉海髮型,諗住睇起嚟年輕啲,但有朋友就勸佢打消呢個念頭,因為呢種髮型同佢唔襯,佢唔接受朋友嘅意見,走去問髮型師,結果都係一樣話唔襯佢,殊不知佢唔忿氣,喺微博上詢問粉絲嘅意見,有唔少粉絲表示劉海唔好睇,佢先至冇剪到。不過話說回來,任性嘅美女又真係幾吸引嘅。

個人微博

簡介:如果問悅兒覺得自己身體邊個部位最靚嘅話,大家估吓佢會點答?答案就係佢覺得自己全身上下都咁靚,真係好自戀。想知道阿妹係咪咁吸引,去佢嘅微博睇吓就一清二楚啦!

網址:http://weibo.com/p/1005052694732651?is_hot=1

信悅兒Profile

出生地:遼寧瀋陽

身高:173cm

三圍:36、26、36

撰文:魂