奧巴馬的「改變」，如今才應驗在特朗普身上。《紐約時報》四月下旬的評論還在討論「特朗普能夠被阻止嗎」，然而，特朗普近日大勝印第安納州初選，已篤定出線，他同日發表勝利宣言，說將在十一月大選砌低對手！
別以為特朗普常常口出誑言，事實已經證明佢不能夠被阻止，而早前嘅民調亦顯示佢首次領先希拉妮，希拉妮成為「美國第一位女總統」的夢未必能圓。《紐約每日新聞》發「訃文」為特朗普的出線贈興，頭版刊載象徵共和黨的卡通大象躺在一副棺木上，左上角標明「共和黨1854-2016」，下方黑底反白字稱：「親愛的，今天我們一起在此哀悼共和黨，這個曾經偉大的政黨，最後死於特朗普瘟疫。」
特朗普一開始參選總統便引來不少抨擊，有論者認為，共和黨很快會變成「特朗普黨」。《紐約時報》早前帶着一種恐懼又自嘲的口脗說：如果特朗普當選，他會對共和黨做些甚麼改變呢？除了特朗普自己，沒有人能猜到，因為他的思維（無論是對外還是對內）總是出乎人的意料，他的政策宣言雖然能煽動衝動的選民，但是缺乏實在的養料；就連他的競選口號：「讓美國再次偉大」，都是直接抄襲列根一九八○年的競選宣言。特朗普極速上位，有評論指是媒體放棄了社會責任和辨別能力，出於收視率的考慮給了特朗普太多曝光的機會，可見橋唔怕舊，最緊要係有宣傳效果。
點講都好啦，在一個不確定的年代，人心思變好正常，你話佢係瘟疫？佢就上演愛在特朗普瘟疫蔓延時，你吹得佢脹咩？民主就有呢啲可愛！老朽都係買多啲花生啤酒，八卦吓特朗普若然入主白宮，會選邊個做社交秘書？佢老婆嘅衣着會否較性感？之不過，相信好快又會爆出呢位富商嘅性醜聞，大家擔定櫈仔睇好戲啦喂，老朽亦已決定小注買佢贏。美國將進入瘟疫年代！