政情：曾智明搞智庫 自掏腰包無籌款
近年除咗新政治組織如雨後春筍般湧現，連智庫都一籮籮，好似由金利來集團副主席曾智明牽頭成立嘅明匯智庫尋日就正式成立。忽然成立新智庫，難免會惹來唔少猜測，但曾智明一一否認，只係話眼見香港發生驅趕內地旅客、農曆新年旺角暴亂等事，大家都好似睇唔到出路，所以成立智庫希望出一分力。問到智庫有無籌款，佢就話所有費用都係自掏荷包，但就唔肯透露金額，只係話佢畀得起喎。
不願透露發展方向
明匯智庫尋日舉行成立典禮，身為主席嘅曾智明致詞時話，成立宗旨係希望匯聚更多正能量，為香港發聲同出力，又邀請咗大約八十名全國人大代表、政協委員、立法會議員、學者等擔任榮譽顧問。佢話，日後會透過研討會、座談會、論壇同網站傳達社會意見，亦會就經濟、民生同內地關係進行研究。不過，問到咁多榮譽顧問點樣畀意見、未來會朝咩方向發展等，曾智明同其他嘉賓都唔願多講，似乎好神秘喎。