本土民主前線梁天琦喺立法會新界東二二八補選後曾毀滅大批機密文件。梁天琦向選舉事務處遞交嘅補選總開支約七十五萬元，其中於選舉雜項開支中，喺補選後八日有一項「文件毀滅」開支，涉及一百四十箱文件，花費一千四百元；另有一場選舉後慶功宴開支，合共八千五百元，包括七千元到會費用。
選舉開支申報資料又顯示，梁天琦於選舉前兩日，有一筆由深圳貨運至香港嘅費用，折合約為一千二百元，而梁嘅競選團隊曾以五百八十元維修發電機，並多次到五金舖購買電油及白電油，合計超過六百元，但未知其具體用途。
此外，梁天琦申報嘅選舉單據顯示其團隊早喺農曆新年旺角暴亂發生前，已於旺角砵蘭街一帶出現。首先喺二月八日晚上約八時半到砵蘭街便利店購買飲品，而於二月九日凌晨時分，再於砵蘭街便利店購買多支飲品和乳酪，合計約二百元；而於凌晨三時許就有一張五十多元嘅的士單據，但申報資料無顯示乘的士嘅起點及目的地。