政情：工會幫建造業追欠薪 周聯僑：做唔到嘢不得好死
建造業近年面對唔少棘手問題，好似輸入外勞、立法會拉布令工程撥款受阻、拖糧等問題，直接影響工人生計。講開拖糧，香港建造業總工會理事長周聯僑就好有經驗，佢話有時大判畀咗錢，係二判同三判拗數先搞到工人無糧出，而處理呢啲問題時唔能夠下下圍地盤，否則拖一年半載都拎唔番錢。
強調收人會費
佢又話，工會幫唔少工人攞番錢，如果唔係每年收人哋一百元會費，做唔到嘢分分鐘不得好死，真係唔講得笑。
周聯僑話，佢所屬嘅工會同業界關係好好，遇到問題時要處理都容易啲。另外工聯會最近以獎金制吸引新會員加入，本身係該會副會長嘅周聯僑話，介紹到人入會可獲優惠券，推介五個人入會仲可以得到五十元進修獎金添。不過五十元真係唔知可以進修啲咩，都係僅僅夠食個飯，唔知工聯會會否考慮提高獎金？