政情：例牌流會議員白逗人工
立法會原定尋日進入財政預算案最後一個辯論環節，由相關官員及動議修正案嘅議員發言，但係人民力量陳志全（慢必）喺會議一開始就要求點算開會法定人數，造就咗今個立法年度第九次流會、今屆立法會三年幾任期內第十六次流會，亦係連續三星期流會。流會過後，建制派同泛民主派議員例牌出嚟互相指摘，但多項法案和撥款就繼續積壓。距離立法會換屆選舉尚餘幾個月，市民真係要睇清楚邊啲係白逗人工嘅議員！
官員未開聲回應已完會
立法會連續三星期流會，尋日會議廳內本嚟已經小貓三四隻，當點算開會法定人數嘅鐘聲響起十五分鐘後，喺席議員人數亦只有廿九人，同法定人數相差六人。其中公民黨和自由黨全體議員缺席，總計泛民只有五名議員喺席，而建制派亦只有廿四人。原本負責回應議員提問嘅官員，包括財經事務及庫務局局長陳家強、創新及科技局楊偉雄、發展局局長陳茂波未開聲，會議就已經結束。
慢必喺會後歸咎係立法會主席曾鈺成一早定下表決時間，又揚言流會將陸續有嚟。同屬人民力量嘅陳偉業就批評建制派「保皇不力」，促請佢哋集體辭職。不過，心水清嘅人都知道泛民經常精神分裂，一方面要求官員回應質詢，另一方面又繼續製造流會，亦借流會迫使建制派議員留守會議廳坐定定，名副其實係消耗敵方體力，而泛民議員就缺席去做自己想做嘅事，完全係損人利己。
只顧宣傳自己 不務正業
至於建制派，就例牌喺流會後鬧泛民點人數「搞事」，雖然佢哋表面上出席人數比泛民多，但其實只有約一半人喺席，大多數人都唔喺會議廳。正如泛民所言，建制派喺抗拉布上已經毫無鬥志，部分人甚至借開會期間自我宣傳，唔係炫耀旅行或陳年照片，就係攞啲陳年古董出嚟呃like博曝光，實際服務市民嘅時間有幾多呢？試問市民每日打開報章和電視睇到呢班議員嘅所作所為，又點投下信任嘅一票呢？