中環出更：黃之鋒父唔信陳章明轉軚
平等機會委員會新任主席陳章明，因為喺上任前講過立法並非杜絕性傾向歧視嘅最好辦法，結果畀一眾關注性小眾團體圍插。不過，佢日前同有關團體代表首次面對面傾談後，部分代表聲稱陳章明已「轉軚」支持性傾向歧視立法，又答應出席「不再恐同日」等平權活動，因此對佢有所改觀。
正所謂「順得哥情失嫂意」，強烈反對立法的宗教及家長團體，會否因而同陳章明反面呢？前學民思潮召集人黃之鋒嘅爸爸、一向反對性傾向歧視立法嘅性傾向條例家校關注組召集人黃偉明尋日發表聲明，話唔相信陳章明「變心」喎！
黃偉明透露，前日與陳章明通過電話，對方澄清「轉軚」只係一場誤會，強調對性傾向歧視立法一向持中立立場，認為平機會嘅角色，應該就有關問題協調不同持份者，作出友善而有建設性嘅溝通。至於陳章明答應出席「不再恐同日」集會，正係友善溝通嘅一種，唔代表佢支持同志運動，佢會在出席集會時說明自己嘅中立立場。唔知關注性小眾團體看到呢份聲明後，會否重新向陳章明開戰呢？
卓妮