港人退休無保障 皆因官僚太涼薄

老有所養,老有所依,係人類社會自古以來嘅一大理想,中國人更加一向重視安老問題,可惜吖,香港話就話係富裕社會,但距離呢個理想似乎愈來愈遙遠,講起都幾可悲。

有團體調查發現,四成七受訪打工仔冇退休規劃,即使有儲蓄或購買保險等習慣,預計退休後嘅銀行儲蓄及保險金額,亦未能達到「可接受範圍」嘅四百萬元退休金水平。團體話喎,調查結果反映市民退休準備意識薄弱,將加重社會喺長者福利及醫療服務嘅壓力,建議市民趁年輕定下退休儲蓄目標,以便有更多時間累積財富。

老實講,有頭髮邊個想做瘌痢吖,係人都明白積穀防饑、儲蓄養老嘅道理,問題係好多基層打工仔收入僅夠餬口,就算想定下退休儲蓄目標都唔得喇。雖然中產人士收入較高,弊在好多人做咗樓奴,供樓去咗一大橛,為子女供書教學又花一大筆,七除八扣之下,仲有幾多錢儲蓄吖。

所以話,好多市民冇退休規劃,非不為也,實不能也。難為港府仲成日吹水唔抹嘴,話香港有三大退休支柱,包括儲蓄、強積金及綜援喎,簡直不知所謂。其實,呢三大支柱根本靠唔住,儲蓄固然唔使講,強積金更加係千瘡百孔,而綜援又限制多多,只有窮途末路至可以申請,你估真係貪過癮咩!

講嚟講去,香港人退休生活之所以缺乏保障,皆因官僚涼薄。社會對設立全民退休保障制度早有普遍共識,連負責研究嘅學者亦認為財政上完全可行,偏偏港府一直詐傻扮懵,話就話進行公眾諮詢,而且搞咗幾場論壇,可惜純屬做騷咁做,唔係玩弄文字遊戲,以所謂「不論貧富」及「有經濟需要」愚弄市民,就係玩弄「狼來了」把戲,以所謂結構性財赤及無以為繼恐嚇市民,你話係咪無良兼無恥吖。

取之於民,用之於民,港府坐擁龐大財政儲備,幾乎肥到連襪都着唔到,港產官僚仲成日呻窮,連全民退保亦唔肯承擔,講都冇人信。正如有人質疑,唔通呢啲財政儲備只係為公務員而設,其他市民得個睇字?唔通只有公務員至可以享受退休保障,其他打工仔只能望天打卦?

無論點講都好喇,香港作為一個富裕社會,依家仲未有一套完善嘅全民退休保障制度,搞到唔少基層市民臨老唔過得世,要靠執紙皮及汽水罐幫補生計,唔止係港人嘅悲哀,簡直係港府嘅恥辱。咪話功夫茶唔提醒,最近有團體發起萬人寫信撐全民退保行動,喺全港設立逾百個街站,如果港府繼續漠視民意,與民為敵,盞自取其辱嘅咋!