政情：八網難逃：阿王衣着被譏似「路姆西」
工聯會推出最新一款侍產假海報，海報主角之一嘅立法會議員王國興（阿王）以紅白格仔恤衫配藍色牛仔褲，就被指酷似示威常用道具「路姆西」（新名：路福西）公仔造型。不過，阿王就話自己成為立法會議員以來，已經着格仔恤衫襯牛仔褲打扮，係佢多年來嘅特色之一。對於有網民又話阿王嘅衣着似有「國師」之稱嘅本土派學者陳雲，阿王反指當年開始着格仔恤衫時都未聽過陳雲個大名，只係大家打扮相似喎。
呢張宣傳侍產假嘅海報，係阿王同初為人父嘅議員郭偉強合力打造，郭偉強抱住新生兒子，而阿王就好似阿爺咁摸吓孫仔，表現得老懷安慰，但就被網民嘲笑佢哋hehe（男同性戀）。不過，阿王就反指海報有接力嘅訊息，因為當年佢出任東區區議員時，郭偉強任其助理，後來郭順利接棒做區議員，依家仲抱住新生兒子接力，訊息正面。郭偉強就話，其實當初都擔心引起hehe誤會，所以就拍成阿王探訪佢兩父子嘅情景。
