中環出更：林卓廷覬覦白鴿兩代靚女
距離立法會選舉不足四個月，各黨派嘅參選名單陸續出爐，民主黨（白鴿黨）早前已進行咗黨內初選訂出各區人選，其中新界東就打算派出北區區議員林卓廷（阿廷）出戰。阿廷已經密密為選舉做準備，為增加勝算，更落力游說黨內兩代靚女合組名單，包括當年着小背心聞名嘅立法會議員劉慧卿（卿姐），以及有「翻版李英愛」之稱嘅沙田區議員曾素麗（Yen），認真識揀。
卿姐受歡迎 曾素麗年輕
阿廷話邀請卿姐同Yen合組名單，並非外表行先，解釋係睇中Yen嘅年輕，以及卿姐嘅地區支持度。阿廷仲透露，早前同卿姐落區，見識到卿姐嘅受歡迎程度，認為卿姐排名單第二係有策略需要，唔怕會逆政黨年輕化嘅潮流。
雖然Yen係新界東嘅區議員，但佢未必一定要做阿廷嘅樁腳，事關佢仲有資格參加俗稱「超級區議會」嘅立法會區議會（二）功能界別選舉，可以排喺參選該界別嘅元朗區議員鄺俊宇名單之內，有望走年輕新一代路線。睇嚟阿廷要落多啲嘴頭爭人至得喇，否則趕唔切喺五月底前落實呢張理想參選名單。
卓妮