中環出更：圓匯波動 廠商避險有計
鯉魚門海鮮美食村係香港美食天堂嘅象徵之一，早幾年被遊客逼爆兼食到貴晒，令好多本地客卻步。公司喺鯉魚門附近嘅中華廠商聯合會（廠商會）會董吳國安見美食村生意淡，早前就同好友廠商會常董盧毓琳、生產零食EDO品牌嘅僑豐行行政總裁黃偉鴻（Ellis）及太太黃王丹等人去支持吓。
講起近期日圓勁升，做日韓零食生意嘅Ellis無有怕，佢話近十年日圓忽升忽跌，佢曾經得益於日圓貶值，但係後來日圓又升番，令佢明白長遠要諗計避開匯率風險。早幾年佢開始供貨畀內地時，就決定以日圓結算，抵銷唔少匯率損失。不過，本地零售方面確係無得避，近期公司便積極入口歐美食品，以降低日貨所佔嘅比例。
樂對困境 鯉魚門歎海鮮
講番鯉魚門海鮮宴，喺內地開電鍍環保廠嘅吳國安話，依家經濟市道差，唔止鯉魚門變得清靜，佢哋做廠嘅都有切身體驗，苦笑話依家好似日日過年咁得閒，認真慘情。不過，佢天生樂觀，決定化悲痛為「食量」，當晚眾人大擦生猛海鮮，食得津津有味。
吳國安話，佢同鯉魚門好有感情，事關佢公司喺附近嘅油塘近四十年，逢親有外國客戶訪港，必帶佢哋光顧鯉魚門食海鮮。佢亦見證鯉魚門外貌改變，想當年未有馬路打通油塘及鯉魚門，出入要喺三家村碼頭搭艇仔，聽落真係唔多方便喎。
卓妮