港府成日將保育掛喺口邊，講到似層層，其實吹水唔抹嘴，純粹得個噏字，唔怪得歷史建築買少見少喇。
好似深水埗欽州街五十一及五十三號咁吖，係本港碩果僅存嘅戰前廣州式騎樓建築物，已有八十幾年歷史，大門有羅馬柱及拱窗設計，屋頂刻有圖案花紋，屬於新古典主義風格，因此被列為一級歷史建築。可惜吖，港府評咗級就關人個關，最近呢幢舊建築被投資者購入，唔止大興土木，而且間成多個劏房出租，搞到面目全非。
據租客所講，呢啲劏房間成一廳一房，有獨立廁所同廚房，月租七千元，相對於同區豆腐膶劏房都要索價六千元，無疑抵得多，唔怪得咁搶手，連地產經紀都話手快有手慢冇。
呢嗱，本報記者現場直擊發現，呢幢建築物除咗樓梯底加裝電錶，牆身及地板更被大翻新，淨係二樓就間成五個劏房，甚至連騎樓都唔放過，都咪話唔誇張。測量師質疑可能影響樓宇結構，引起安全問題，唔係杞人憂天，呢啲舊建築嘅結構通常比較簡單，點可以隨便改動o架。
大家可能會問，一級歷史建築話拆就拆，話改就改，唔通冇法例規管咩？呢個正正係問題所在，當局話就話有通報機制，屋宇署收到業主呈交嘅樓宇拆卸圖則或重建發展圖則時，會將個案知會古物古蹟辦事處採取「搶救」行動，不過小型工程就不在通報之列，好多業主正係利用呢個漏洞將歷史建築改頭換面，令歷史價值大打折扣，將來即使拆卸重建，阻力都少好多。
事實證明，港府嘅所謂保育根本係葉公好龍，信佢一成，雙目失明。係人都知，歷史建築評級機制由古物諮詢委員會負責，屬於行政性質，冇法定權力，完全保護唔到歷史建築，只有建築物被列為法定古蹟，先至可以阻止業主清拆，但由於涉及賠償等問題，港府一聽見個錢字就詐傻扮懵，次次都要等到歷史建築被拆毀，引起社會關注，先至被迫補鑊，結果次次都以失敗告終。好似有近百年歷史嘅何東花園咁吖，就算一度列為暫定古蹟，最終仍難逃被拆卸嘅命運。
所以話，保育唔係趕潮流，更加唔係靠把口，必須有全面政策及賠償機制配合。港府乜都唔做，一味出口術，業主在商言商，睬佢都傻喇。講到尾，香港係資本主義社會，私人財產受到法律保護，港府唔肯賠償，又想保育，世界上邊有咁大隻蛤乸隨街跳吖。有人曾建議設立歷史建築保育基金，可惜當局一直當耳邊風，再咁落去，本港歷史建築遲早統統淪為集體回憶，何止欽州街五十一號淪為劏房吖！