政情：馮敬恩錯到尾 拒就洩密道歉
香港大學學生會前會長馮敬恩尋日最後一次以本科生身份出席校務委員會會議，會前竟然公開道歉，莫非佢終於知錯，為過去破壞校務委員會保密協議、偷錄風波等事件致歉咁戲劇性？
其實馮敬恩只係向當日有份投票選佢嘅港大學生道歉，話無辦法令到副校長任命喺公平同合乎程序公義下完成，又阻止唔到李國章出任校委會主席，所以感到抱歉同惋惜喎。
港大校委會 設小組檢討
馮敬恩就重申，已經傾盡所能捍衞學生利益，確保校委會有聆聽學生聲音。除咗道歉，佢又多謝同學、校友嘅支持，令到學生會喺守衞港大戰役中唔使孤軍作戰喎。
校委會最後通過咗成立三人專責小組，去檢討港大嘅管治及效能。小組將會就港大管治架構全面檢討，更會喺六月舉行會議同論壇收集唔同持份者意見，預計今年第四季完成檢討報告。