政情：今日你上鏡：謝偉銓玩軍用航拍機過手癮

立法會議員謝偉銓日前到深圳考察科技公司，見佢手持遙控器操控一架巨型航拍機，佢話係一部碳纖維機身嘅軍用航拍機，最高飛行海拔七千米、最大承重十五公斤，除用作海關執法、消防搶救外，仲有地質監察及大型賽事拍攝等多項用途。佢話依家建築及測量界經常都會應用到航拍機，但今次係佢第一次親身接觸，仲笑言部機已經調校咗自動駕駛，佢都係過手癮扮控制咋。