政情：建制夥中間派 謀搶九西新席

內外部均撐狄志遠

現時泛民同建制派嘅九龍西議席比例係三比二，泛民議員有民主黨（白鴿黨）黃碧雲、公民黨毛孟靜同獨立議員黃毓民；建制派則有西九新動力梁美芬同民建聯（民記）蔣麗芸。建制派對於新增一席早已虎視眈眈，早前曾傳工聯會（工記）派人出征，可惜工記原定派出嘅人選未成氣候，加上不論工記定民記出選，都只會分薄梁美芬同蔣麗芸嘅票源，所以最理想係由中間派代為出戰。

佔領行動過後，民主派分裂造就中間派崛起，脫離白鴿黨成立新思維的狄志遠就是主張中間路線嘅一分子。一早劍指立法會選舉嘅新思維原本打算由副主席姜炳耀出選九龍西，但新思維內部就傾向支持狄志遠出選，就連新思維外部建制勢力都撐狄志遠參選。新思維更修改黨徽顏色，以代表同時包容「黃絲」及「藍絲」，加強中間派形象。另一邊廂，主打中間路線、同樣有意派人競逐九龍西議席嘅民主思路，盛傳佢哋正為林作鋪路參選九龍西。

泛民本土加入混戰

不過，九龍西新增一席並非建制派專利，傳統泛民以至激進本土都有意出戰。喺九龍西扎根嘅民協，已決定派出老將深水埗區議員譚國僑出選，另外仲有青年新政游蕙禎、學聯前秘書長周永康同前副秘書長岑敖暉、熱血公民黃洋達，再加埋自由黨深水埗區議員李梓敬及競逐連任嘅多位議員，到時肯定打到七彩，真係要買定花生等睇戲。