中環出更：「搞事四人幫」又晤外國勢力
立法會選舉臨近，國家領導人又即將訪港，再加上「港獨」爭議持續升溫，又係以壹傳媒集團前主席黎智英（肥佬黎）為首嘅「搞事四人幫」密會攪局嘅時候喇！位於何文田嘉多里道嘅肥佬黎大宅，尋日連搞兩場密會，相當熱鬧，夜晚密會更有曾任美國海軍情報員嘅肥佬黎左右手Mark Simon，同另外多名外國人參與，仲話唔係勾結外國勢力？
尋日中午時首先有一男兩女外籍人士，分別乘坐肥佬黎名下嘅私家車、的士，以及另一名貴房車到訪，逗留咗個幾鐘先離開。
到傍晚六時許，肥佬黎又喺屋企攪局，首先係一對上咗年紀、疑似係夫婦嘅外籍男女乘坐的士到場，之後又見一名壹傳媒前高層、以及肥過肥佬黎嘅Mark Simon坐私家車到達。
獨欠陳日君
相隔十多分鐘後，另外兩名「搞事四人幫」成員終於「歸位」！先係外號「李漢奸」嘅民主黨創黨主席李柱銘，乘坐肥佬黎名下七人車到場，七人車後座仲有一客人，但由於落咗窗簾而睇唔清究竟係何方人物。李漢奸剛落車無耐，外號「民主阿婆」嘅前政務司司長陳方安生，又乘坐肥佬黎名下私家車到達，連同肥佬黎本人，「搞事四人幫」只欠天主教香港教區前主教陳日君就「齊腳」。
直到七時許，再有一名中年外籍男子姍姍來遲，坐的士抵達肥佬黎寓所，呢位外籍男子好大方向記者遞上卡片，原來佢係《華爾街日報》嘅高層。
眾人喺黎宅玩到九點半先捨得走，唔知肥佬黎經過一晚同外國勢力交流後，又度到咩反中亂港嘅大計呢？
卓妮