近排打開報紙，幾乎日日都有涉及南亞兵團嘅負面新聞，唔係搶劫就係偷竊，唔係販毒就係勒索，唔係非禮就係打交。尋日仲搞出人命添，一名混血女子懷疑被一名巴基斯坦籍男子以電鑽襲擊，頭部重傷不治，巴籍漢當場被警方拘捕，現場並檢獲小量毒品，問你怕未。
其實，南亞兵團威脅本港治安已經唔係一朝一夕嘅事，皆因港府無知無覺，問題先至不斷惡化。其餘唔講，淨係由南亞人組成嘅白牌車「接機黨」咋，就搞到機場七國咁亂。本報記者連續多日實地視察發現，一批擁有十幾輛客貨車嘅南亞人懷疑違法接客，日日盤據喺機場抵港大堂，專向同鄉或同聲同氣嘅旅客埋手，而且收費唔平，試過由機場往重慶大廈索價一千二百元，都咪話唔誇張。
正如有機場職員話齋，南亞白牌車「接機黨」已存在多年，成為機場亂象嘅癥結，佢哋唔會貿然接載非南亞裔旅客，令當局無法取證，難以取締，就算被截查亦可以辯稱接載同鄉及親戚。而根據警方紀錄，近年檢控非法載客取酬嘅個案明顯趨升，由前年嘅十九宗升至去年嘅五十八宗，增幅達兩倍，唯獨對呢班南亞白牌黨束手無策，唔怪得佢哋有恃無恐喇。
係人都知，乘搭白牌車毫無保障可言，除咗經常遇到濫收車資，萬一遇上交通意外亦冇得賠償，而合法經營嘅的士更首當其衝，成為最大受害者。有業界人士透露，以往每十單生意中，至少有兩單係南亞裔乘客，但自從南亞裔白牌車殺入機場後，近幾年已經見唔到南亞裔旅客搭的士。
事實證明，南亞白牌黨唔止劏同鄉，而且令的士業界冇啖好食。有立法會議員就講得啱嘞，香港國際機場一直位列世界最佳機場嘅前列位置，唔可以任由呢班南亞兵團肆虐，港府應該聯同機管局加強管理，內外夾攻，盡快杜絕南亞「接機黨」，一來保障旅客利益，二來維護香港聲譽。
當然喇，南亞兵團無惡不作，犯案纍纍，白牌車可能仲係小兒科咋。前日之嘛，灣仔、尖沙咀及大角咀就先後發生四宗涉及南亞假難民嘅罪案，包括十幾名南亞人群毆、搶劫及盜竊，有假難民甚至連地盤內嘅電線都照偷可也，問你服未。有區議員直言假難民太猖狂，係全港性問題，而且不斷惡化，街坊成為驚弓之鳥，港府應盡快考慮退出聯合國《禁止酷刑公約》。
冇錯嘞，隨着假難民愈來愈多，香港已淪為危城，市民嘅忍耐力有限，當局繼續猶豫不決，等到官逼民反，咁就後悔莫及喇！