家陣嘅Model唔單止要睇得同演得，仲要Talk得，咁先至可以喺競爭激烈嘅模特兒界突圍而出。新女夏美醬外形誘人，透過網絡直播將其非凡魅力傳送到大家嘅眼睛，從而令人氣直線飆升。
嚟自上海嘅夏美醬，今年18歲，出道短短一年，佢跟同期新人唔同，並冇馬上推出寫真以及參與各種商演活動嚟增加人氣，反而被公司安排到日本培訓，培育成一個全面嘅模特兒。
樣子俏麗兼且身材玲瓏浮凸嘅美醬，驟眼睇予人純情嘅感覺，但從佢手臂上嘅紋身卻又散發出一股野性味道，呢種糅合斯文及狂野嘅氣質，令佢未來嘅發展更加值得期待。自佢出道以嚟，先後推出過多部寫真作品，當中不乏性感演出，不過，佢有性感底線，就係堅持唔露三點。的確翻開佢嘅寫真集，最性感嘅一張相片，只不過係露出大半條而已。至於未來會唔會喺其他平面媒體上見到佢嘅演出，就要睇吓大家有幾支持佢喇！
同好多90後一樣，美醬係一位動漫迷，自稱宅性十足嘅佢，最愛喺屋企睇漫畫同打機。須知道唔少宅男嘅幻想係可以搵到個志趣相投兼且索爆嘅女友，一同過住宅爆嘅生活，難怪佢亦得到宅男女神嘅稱號。可能有人覺得呢啲會唔會係美醬嘅宣傳手法？可以好肯定咁話畀大家知唔係，皆因阿妹確實係好鍾意打機，尤其係至愛網絡對戰遊戲《League of Legends》，佢仲已經攞到鑽石段位，更自稱擁有黃金嘅實力！
作為一位模特兒兼機迷，美醬就諗到以網絡直播嚟同粉絲進行互動，佢仲好勤力每晚都會玩直播，一展佢嘅打機身手，但係佢就一定唔會表演唱歌，當中原來有段古。話說喺上年嘅直播中，佢一時興起大展歌喉，點知唱功實在太差，搞到粉絲個個都熄機，為免再次出現呢種尷尬情況，佢以後都唔會喺直播中唱歌。講到未來嘅發展，佢暫時仍會以模特兒工作為重心，至於會唔會好似其他模特兒咁進軍演藝界，則要睇有冇呢個機會喇。
簡介：作為一個既有外形又精於打機嘅宅女夏美醬嚟講，最希望就係令更多人認識佢。為咗吸引多啲粉絲，佢最愛喺微博同粉絲進行互動，並且透過一啲小遊戲大派福利，唔知下一個幸運兒係咪你呢？
網址：www.weibo.com/u/2749849973?is_hot=1
出生地：上海
身高：163cm
三圍：35、23、36
撰文：魂