探射燈：歐洲設公共雪櫃倡分享食材

現時德國與西班牙均在街頭設有「公共雪櫃」，擺放商戶及市民原打算丟棄的食物，任何人均可隨意取用。早前法國亦通過法例，要求超級市場捐贈未能出售的食物予慈善機構，或用作堆肥。有法律界人士指出，捐贈棄置食物者需要面對一定的法律風險，但有環保團體認為，可以引入免責法例，從而推廣捐贈食品。

律師梁永鏗表示，即使標明食物已經過期及未能保證品質，但倘食用後出現事故，捐贈者或需負上法律責任，「因為有可能啲食物唔係變壞，而係本身有問題，所以都會受到調查，唔係話係捐嘅，就完全零風險。」

環保觸覺義務總幹事譚凱邦則指出，現時常見做法為商戶與受惠機構自行簽署合約，由後者承擔責任，「咁樣都好令人卻步，同埋唔能夠直接捐畀受惠者。除非法例有足夠保障，否則都係言之尚早。」