政情：劉國勳獲確認出戰立會
立法會九月換屆，各黨派已陸續定出「出戰」名單。北區區議員劉國勳確認，佢已經喺其所屬嘅民建聯（民記）以過半數票數勝出立法會功能界別區議會（一）界別嘅遴選，料將於九月代表民記出選，取代現任議員葉國謙。而早前辭任行政會議成員一職嘅民記立法會議員李慧琼（Starry）將會於俗稱「超級議席」嘅區議會（二）界別角逐連任，而該黨於上月立法會新界東補選落敗嘅離島區議員周浩鼎（Holden）亦都會代表民記出選超級議席。
劉國勳尋晚透露，佢以過半數票勝出民記黨內遴選，一百一十七名民記區議員全部都有投票，但具體得票數字就唔公布。而尋日只係佢哋黨內遴選委員會向中委備悉工作進展，當中包括確認Starry同Holden會代表民記出戰超級議席。
劉國勳又話，雖然已勝出黨內遴選，未來仲要拜會各黨派，爭取佢哋支持自己出戰立法會區議會（一）界別，強調仍然同民記中西區區議員陳學鋒、深水埗區議員鄭泳舜及觀塘區議員洪錦鉉三位同樣有參加黨內立法會區議會（一）界別遴選嘅黨友「一條心」，未來亦都會互相支持對方工作。