政情：白鴿怕執輸 掹本土車邊

論述一國兩制政改問題

白鴿黨中常委區諾軒尋日喺港大論壇上放風，指該黨於兩星期前舉行集思會後，決定草擬一份《決議文》，寫低該黨認為要守護嘅本土價值，以回應時代挑戰。《決議文》嘅內容主要分為兩部分，包括本土論述與一國兩制，以及政改如何推進嘅問題等，亦會涉及泛民如何與中央溝通。《決議文》會經由黨大會投票，五月再對外公布。

區諾軒承認，白鴿黨嘅黨綱未能配合社會發展，「當時講緊民主回歸，依家已經回歸咗好耐」，但係要修改黨綱嘅門檻太高，所以決定用《決議文》方式回應本土問題。區諾軒又強調，該黨並非因為公文袋有《十周年宣言》而人有我有，《決議文》一事早已在黨內討論。

寸公文袋《宣言》口水嘢

對於公文袋早前嘅《十周年宣言》，有白鴿黨中人曾經批評「冇內涵，搔唔到癢處」，又指內容空洞，都係「口水嘢」。羅健熙強調，白鴿黨唔會新瓶舊酒，至少《決議文》唔會再講對民主回歸嘅想像，而係分析回歸後得失，再由現實看一國兩制如何走下去。佢又相信，支持本土派嘅人只係少數，該黨追求民主嘅方式仍然有一定支持。既然如此，該黨又何須跟風回應本土思潮呢？

其實本土派有幾多支持一直都係未知之數，而傳統泛民黨派傾向本土，亦未知能否爭取更多選票，最怕係扮本土唔夠立場鮮明嘅激進本土派定位清晰，最後「唔湯唔水」、「偷雞唔到蝕揸米」。