民協一直都係一人黨，今年佢哋打算再接再厲，力爭上屆失落嘅九龍西直選議席，最初原訂由上屆落敗嘅譚國僑再戰，點知黨內已有新老交替之聲，中生代嘅新任主席莫嘉嫻亦有意披甲上陣，並有望獲支持出戰。譚國僑有感或落後於大形勢，直指會主打「二次殖民」，希望吸納黨內支持博翻身。不過，既然「新老交替」係大勢所趨，咁主打咩議題同應否出選仲有關係咩？
譚國僑話，佢由中英前途談判經歷至回歸後，原以為港人可以當家作主，但至今中央承諾嘅「一國兩制」、「高度自治」均無影無蹤，特區政府又難以溝通，民協一直追求嘅「又傾又砌」根本無從入手。
佢形容呢個現象為「二次殖民」，並會向黨友推銷呢套論述，希望喺六月民協舉行三十周年籌款晚宴時有所着墨。佢又話，黨友會挑選最有勝算嘅人出選九龍西，下月會就九龍西舉行黨內論壇，希望五月會有各區參選名單。不過，問佢比莫嘉嫻有何優勝之處，佢就唔願回應喇！
卓妮