中環出更：專資會成員 齊齊鬥消脂
近年健康飲食風氣盛行，英國早前就針對當地兒童癡肥問題，計劃開徵「糖稅」，稅收用來資助學校體育活動。卓妮早前於香港專業及資深行政人員協會（專資會）活動上見到該會一班成員，點知個個都話要減肥。其中理事容海恩自爆，曾經有段時間有肚腩仔，仲喺馬爾代夫曬到有摺痕，終於下定決心節制飲食，依家飲凍嘢一定會走甜，又唔飲奶茶同咖啡，盡量多菜少肉。
專資會一班專業人士平日工作忙碌，應酬又多，一唔覺意好易變肥，本身係律師嘅專資會成員陳慧蕊與容海恩都經歷過。
容海恩健身 陳慧蕊打拳
身形睇落瘦削嘅容海恩話，現時每星期做兩次健身保持運動量，而佢中學時代亦玩過跆拳道，但當時短頭髮又瘦，啲師兄唔知佢係女仔，對佢出手好重，所以佢最終就放棄咗。
至於近年積極打泰拳減肥成效不錯嘅陳慧蕊，去年仲開埋社企教年輕人打泰拳，幫佢哋建立興趣之餘，仲搵機會幫佢哋將興趣發展成事業。不過，單係做運動係唔夠，佢認為飲食都好重要，好似食得多甜嘢除咗會肥，仲會感覺皮膚差啲，食太鹹一樣唔得，所以最好就係少糖少鹽少油清淡啲。
早前專資會換屆，新一屆主席會長陳紹雄接替前會長盧偉國擔大旗揸莊，佢希望繼續團結一班專業人士為業界發聲。同場仲有前會長胡曉明、副會長張華強、理事楊素珊、楊章桂芝同華慧娜等成員。張華強話自己一個月行三次山，專資會內有唔少朋友都係佢嘅行山隊友，做運動順便聯誼，一舉兩得。
卓妮