當今神州道德淪亡，假冒偽劣產品遍地開花，食品安全問題固然無日無之，連疫苗亦頻頻出事，問你怕未。
最近山東爆發特大黑心疫苗醜聞，數百萬劑未經冷藏嘅疫苗銷往全國二十四個省巿，涉案金額高達五點七億元人民幣，無數兒童受害，搞到人心惶惶。唔少內地家長焗住帶子女來港注射疫苗，網上更瘋傳一份「帶孩子去香港打疫苗全攻略」，詳列本港各母嬰健康院嘅地址、電話、手續同收費水平等，唔怪得有人擔心本港繼「奶粉荒」後，隨時出現新一輪「疫苗荒」。
唔係杞人憂天(口架)，今次係內地歷來最大宗嘅疫苗衞生醜聞，流毒廣、禍害深，家長唔擔心就假。試諗吓，內地有咁多細路仔，就算只有百分之一落嚟打針，香港都吃不消喇，奶粉荒已經搞到滿城風雨，萬一再爆發疫苗荒，都唔知點收科。上次港府推出「限奶令」，今次會唔會推出「限苗令」呢？
講起真係諷刺，香港回歸十九年，金融中心地位不斷退步，反而愈來愈成為內地居民嘅「採購中心」。事實證明，「中國製造」質量一日唔改善，內地人焗住捨近求遠，兩地居民嘅摩擦就無法避免，中港矛盾就冇可能化解。
歸根究柢，內地假冒偽劣產品之所以氾濫成災，主要原因係官商勾結。好似今次黑心疫苗風波咁吖，牽涉多層疾控部門，經銷商將民眾自費接種嘅二類疫苗售予疾控部門，再向下分發，最終由地方嘅衞生院、診療所等以類似傳銷方式向市民推介，結果由上而下層層加價，層層回扣，一支二十元嘅疫苗，最後接種到市民身上就要百幾元，你話係咪離譜吖？正如有內地居民話齋，當局對動物疫苗尚且有嚴格規定，唔准私人買賣批發，反而人類疫苗就無王管，任由奸商及貪官上下其手，簡直當百姓豬狗不如！
一如既往，呢單醜聞曝光後，當局例牌賊過興兵，國家領導人下令嚴查，各省市紛紛補鑊，仲高調公布十幾家涉案企業名單添，可惜吖，呢啲咪又係做騷。老實講，內地已經唔係第一次揭發黑心疫苗，呢單案件更加跨越六年咁耐，早就被傳媒踢爆，當局究竟係一無所知，定係詐傻扮懵呢？如果監管部門做好自己份工，又點會頻頻出事呢？
所以話，奸商謀財害命固然可殺，貪官助紂為虐同樣罪無可恕，當局唔徹底追究失職官員嘅責任，無論點樣嚴查，都係嘥氣嘅咋。
正所謂，城門失火，殃及池魚，每逢內地出事，香港都難以獨善其身，今次黑心疫苗風波不斷蔓延，引起內地家長恐慌，香港出現疫苗荒一啲都唔出奇，港府究竟有冇應變措施(口架)？