立法會議員梁國雄（長毛）聽日就六十歲，長毛就快變白毛，社民連黨友及老友們用咗逾一年時間，靜靜雞籌備一本屬於長毛嘅書賀佢六十大壽，尋日放喺酒箱當靚酒送畀長毛。新書《我反抗故我在》記錄長毛廿幾年來同法院打過嘅官司，仲邀請立法會主席曾鈺成、前立法局主席黃宏發等人講吓佢哋眼中嘅長毛。雖然長毛收禮好開心，但笑言生日其實係「母難日」，唔應該幫自己慶祝，仲話依家呢個時勢唔應該做壽，完全政治不正確喎！唔通長毛嫌大家送「書」畀佢，就快選舉「輸輸」聲唔吉利？
