政情：刀疤剛選法團白鴿黨友介入 招民憤
前年佔領行動期間，壹傳媒集團前主席黎智英（肥佬黎）一直鎮守金鐘「皇座」扮指揮，期間黑幫人物「刀疤剛」李繼剛被拍到長期傍實肥佬黎，「刀疤剛」更走入立法會與民主黨（白鴿黨）立法會議員單仲偕會面，三人關係耐人尋味。正當大眾對於白鴿黨、肥佬黎、「刀疤剛」嘅關係充滿疑惑之際，有讀者爆料，指單仲偕與黨友中西區區議員許智峯喺一個業主大會中支持「刀疤剛」出任業主立案法團委員，質疑當中係咪有圖謀。
有自稱係筲箕灣東濤苑居民尋日爆料，指控單仲偕及許智峯喺上月廿八日出席東濤苑居民大會，利用手上嘅授權書，投票支持「刀疤剛」出任業主立案法團成員，引起大批居民不滿，並進一步指證白鴿黨同黑幫過從甚密。
許智峯：受業主所託投票
許智峯接受查詢時解釋，當時是受一位姓周嘅業主所託出席業主大會，他承認按照姓周業主嘅要求投票畀「刀疤剛」，但指自己只係得一票，唔可以左右選舉結果。問到係咪認識「刀疤剛」，佢指係當日喺現場認識，唔存在專程到場支持。據許智峯所知，單仲偕係受另一位業主所託出席會議同投票，而佢未完場就因要事離開，本報截稿前仍未獲單仲偕回覆。
事實上，「刀疤剛」與肥佬黎及白鴿黨嘅關係千絲萬縷。首先，「刀疤剛」喺佔領行動時經常現身金鐘佔領區傍實肥佬黎，貼身護送黎出出入入，又同黎喺同一帳篷下密密斟。「刀疤剛」又曾經以與單仲偕見面為名，帶大批人入立法會大樓，可見他同白鴿黨關係匪淺。肥佬黎曾自爆是經單仲偕介紹認識「刀疤剛」。最後，白鴿黨曾被爆出涉收取肥佬黎千萬捐款，三者關係可以話環環緊扣，相信白鴿黨有必要就事件向公眾解釋清楚。