中環出更：廠商會會董齊齊抬冷氣
每年在維園舉行嘅工展會尋日首度移師澳門，一連三日在澳門漁人碼頭會議展覽中心舉行。主辦單位香港中華廠商聯合會（廠商會）一班會董拉大隊過澳門撐場。過往會董們出席呢啲場合，通常只係買幾包嘢食當係支持，點知今次有幾位會董唔止畀面咁簡單，睇啱平靚正嘅冷氣機，竟然買咗搬番香港，仲大嗌好抵買，認真搞笑。
工展會第一次進軍澳門，唔少參展商都抱小試牛刀心態，有人更講明唔期望賺好多，只想讓多啲人認識香港品牌。不過廠商會副會長徐晉暉、常董李世傑及會董梁啟洲好識貨，三人行行吓被發現一人抬住一大個箱，咪以為佢哋係幫手做「咕喱」，只係咁啱見到平貨，所以掃番屋企。
價錢合理 買番香港
徐晉暉話，佢哋手上係直立式冷氣機，可以抽濕用，啱晒依家嘅天氣。李世傑就話，家傭房間冷氣剛好壞咗，部機價錢約一千元，佢見合理就即刻買咗，但附近冇車，所以要抬住走。
同場仲有會長李秀恒，副會長戴澤良、史立德，常董楊華勇及廠商會金融服務業主席羅程剛等。羅程剛話，好耐冇去澳門玩，所以今次同楊華勇提早一晚過嚟。李秀恒就話，今次係首次喺澳門舉辦工展會，澳門政府過往較着重推廣旅遊及飲食，產品方面較少，因此對於今次工展會相當重視，若效果理想，唔排除明年再舉辦。戴澤良就指，首日原以為會落雨，幸好天公作美，下午人流漸多，預計銷售額可達一億港元，每日人流約三萬人次。
卓妮