政情：上司吳得掂 助理急跳船

風波不斷 吳被嗌下台

吳得掂自從二○一二年七月上任後，處理德育及國民教育科爭議一鑊粥，去年處理小三全港性系統評估爭議時被批唔願意聽意見，寧可去日本睇紅葉，都唔出席立法會公聽會，再加上上周末出席一間中學校慶活動後，被質疑於私家車上玩手機都唔落車接收學生請願信，再次成為多方批評嘅目標，更有意見要求吳得掂問責下台。

儘管如此，正如吳得掂日前反駁質疑指「欲加之罪，何患無辭」，佢向來自我感覺良好，有傳佢歸咎部分問題嘅原因，同部分同事能力有關。正所謂「日久見人心」，據聞吳得掂身邊嘅同事不滿情緒，亦如雪球般不斷滾大，首先於吳得掂上任後僅兩個月，有傳吳得掂與前新聞秘書李黎式暉不咬弦要求換人，官場其後又傳出吳得掂與時任常任秘書長謝凌潔貞，不論處事手法及政策觀點都南轅北轍，最後謝凌潔貞亦獲調至另一政策局工作。

「大內總管」一年頂唔順

最新一個吳得掂身邊人出走，就係被視為局長「大內總管」嘅政務助理陳天柱，政府尋日公布陳天柱會接任灣仔民政事務專員，並於今日正式履新。官場消息指，陳天柱嘅離開唔尋常，事關政務助理屬於局長近身之一，事無大小都有份處理，慣例亦會做起碼兩、三年，之不過據知陳天柱只係做咗不足一年，頂唔順吳得掂要求出走嘅傳聞不脛而走。

另有官場中人分析，陳天柱現年四十多歲，如果真係頂唔順上司，轉換崗位都係出路之一，事關如果蹉跎歲月，搞唔好隨時阻礙升職前途，相反由今日開始，陳天柱出任被外界視為發揮機會較多嘅灣仔民政事務專員一職，似乎今次成功轉換跑道屬於明智之舉。

至於接替陳天柱任教育局政務助理、係剛離任商務及經濟發展局首席助理秘書長嘅余健強，有官場中人對佢工作表現評價一般，究竟於新崗位能否殺出一條血路，相信其中一個重要指標，就係吳得掂於餘下一年多任期內，係咪可以做番啲令人有印象嘅政績嘞！