中環出更：醫委會改革 張宇人 郭家麒舌戰
關乎醫務委員會改革嘅《二○一六年醫生註冊（修訂）條例草案》，可能因泛民轉軚「被拖死」，有關草案委員會尋日開會選主席，身為醫生嘅公民黨郭家麒爭做主席，惹起提倡醫委會改革嘅立法會飲食界議員張宇人極度不滿，二人其後更互轟涉利益衝突！
互轟涉利益衝突
有關草案委員會尋日召開首次開會，自由黨方剛及民建聯陳恒鑌分別當選正副主席。張宇人發言時點名炮轟郭家麒同其他泛民議員，經常企喺道德高地，又話郭家麒係一名私家醫生，明明了解唔少市民對私家醫生有不滿，政府先作出相關修訂，批評郭仍要爭做委員會主席，形容係「離晒大譜」。
對於今次修訂令醫委會新增四名業外委員，張宇人話一批醫生突然搵出罅隙，話不滿該四名委員要由特首委任，其實依家醫委會直選嘅位置都係「自己選自己」，都係「圍威喂」喎。
郭家麒發言時反駁指，張宇人女兒同女婿未能回港行醫，亦從冇以此作為口實，質疑對方點解要攻擊其他議員；郭並強調，自己做事從來唔係為咗維護私家醫生嘅利益。草案委員會首次會議已經火藥味咁濃，睇怕之後正反陣營都會好戲連場。
卓妮