唔怕郵政壞腦 最怕官僚撞邪

係咁嘅，日前香港郵政中央電腦系統突然發生故障，導致全港百多間分局服務受阻，投遞、取件及繳費等七項服務被迫停止，搞到市民大失預算，怨聲載道；以為問題已經解決喇，點知尋日又嚟過，唔少郵政局受影響，連寄掛號信服務都一度暫停，問你服未。

最好笑嘅係，郵政官僚語焉不詳，閃閃縮縮，只係話正進行電腦系統工作，暫時改以手動模式處理櫃位交易，排隊輪候時間較長喎。好心喇，壞腦就係壞腦，又唔係第一次，衰咗咪承認囉，仲使乜遮遮掩掩吖。如果唔係壞腦，唔通係撞邪？

話時話，香港郵政服務每況愈下，七國咁亂，話唔定真係撞邪o架。就講壞腦事件吖，去年底失驚無神發生故障，全港郵局服務受阻，估唔到依家咁快又出事。正如有立法會議員話齋，一次壞機就話係偶然啫，電腦系統三日唔埋兩日出事，今次已經係三個月來第三次，絕對唔正常。難怪市民忍無可忍，有人怒吼：究竟壞夠未吖！

講起都幾諷刺，私營企業搞郵遞服務，效率一流，使命必達，而香港郵政就效率九流，電腦必壞。難為港府仲成日自欺欺人，將郵政虧蝕歸咎於市場競爭，其實，以郵政咁差劣嘅服務，仲有人幫襯已經偷笑喇。正所謂，物似主人形，「綜合郵務系統」推出唔夠兩年就問題多多，一壞再壞，呢個咪就係郵政官僚渾渾噩噩嘅寫照囉。

講開又講，香港郵政管理混亂，烏煙瘴氣，又點止壞腦咁簡單吖。淨係本報近年踢爆嘅亂象咋，已經厚過電話簿咁滯，包括霸佔中環郵政總局黃金地皮、濫發超時補水、業績年年見紅、員工集體蛇王、失信於民等等。而審計署亦多次展開調查，去年發表報告狠批郵政十宗罪；立法會其後亦發表報告炮轟香港郵政，對種種亂象表示遺憾及失望添。可惜吖，郵政官僚勝在面皮夠厚，完全當審計報告冇到，連立法會帳委會嘅「遺憾」都闊佬懶理，簡直唔知個醜字點寫。

最離譜嘅係，近年郵遞服務需求不斷下降，香港郵政愈做愈縮，但係員工逾時工作依然爆晒燈，淨係一四至一五年就高達一百三十多萬小時，其中近八成以一億七千多萬元超時形式補水，如果話當中冇蠱惑，細路仔都唔信喇。

所以話，唔怕郵政壞腦，最怕官僚撞邪。香港郵政已經爛透心，再唔速速整頓，何止服務質素差劣咁簡單，隨時拖累成個港府「當機」都似！