探射燈：韓圜插水引爆港人消費欲
韓貨有買趁手！韓圜弱勢，跌至五年半新低，由一四年中每一萬韓圜兌約七十七港元，跌至近日約六十五元，相信為「哈韓族」大手入貨的最佳時機，無論韓服、化妝品、食物，甚至遊覽入場券都在韓圜疲弱下，「減價」一、兩成，令有鍾情韓貨的少女大破慳囊，今季因而多花數千元在搶購韓服及化妝品上。有韓服店東主指，韓圜下跌令入貨成本下降，生意大升近三成；有韓牛店老闆亦估計來貨價可下跌一成，將着手購入更多款式食品；旅行社亦有望追回去年南韓因新沙士而下跌的生意額。有專家指，韓圜下跌空間雖有限，但仍估計今年下半年會再下跌約一成。
「一年前要成四百蚊嘅一件韓衫，依家唔使三百蚊就買到，真係平咗好多！」九十後「哈韓族」Clarice多年來鍾情南韓貨品，無論衣服、化妝品及食物，統統均買韓貨，她坦言韓圜下跌絕對令她受惠，「以前一千蚊港紙買到兩件衫，韓圜跌咗之後可以買到三件衫，仲買埋飾物，明顯平咗好多。」
Clarice亦指，面對韓圜下跌難以忍手，因而多了光顧代購，「會多咗試新嘢，以前會諗吓先買，依家平平哋都照買，留嚟試咗先算。」她提到，南韓化妝品及零食的價格均有下調趨勢，大概便宜一成，預計今季會多花費數千元，「係幫我慳咗唔少，但同時使多咗好多錢，仲要撞啱換季，使費仲多。」
帶動港店生意上升
「屋企人、朋友都有好多人鍾意去南韓旅遊，韓圜跌梗係會想去多轉。」模特兒Fiona表示，韓圜下跌有一定吸引力，會令她嘗試更多不同款式的南韓服裝、 化妝品及食物，「可能會因為咁而花費多咗。」
韓風近年襲港，不少「哈韓族」均追隨韓星衣着，而韓服一直以質料好及款式多見稱，價錢並不便宜，但韓圜跌，韓服變相大減價。南韓一大型網上購物平台中，一條近日熱賣、價值一萬八千韓圜的「減磅褲」，由以往約一百四十元港元（以一四年中一萬韓圜兌約七十七港元計算），現時只需約一百二十港元（以現時一萬韓圜約兌六十五港元計算）。受港人追捧的動物面膜，一片過往售近港幣十元，現時只需約八元便可購得。
「呢一、兩個月我哋喺東大門入貨都鬆手咗，啲衫平咗一、兩成。」於銅鑼灣開設樓上韓服店的Cyrena表示，韓圜下跌不但入貨成本下降，同時更帶動生意上升，部分貨品更需要多次補貨，「多咗好多客嚟買嘢，亦都爽手咗，佢哋更加會叫我幫手代購其他貨品，好似化妝品。」
韓牛來貨價跌一成
除了韓服，韓牛亦是港人熱捧美食之一，南韓對於外銷貴價韓牛有一定數量的限制，價錢亦較由其他國家入口的牛肉昂貴，新國華肉食公司老闆廖煦昕預料，韓圜跌勢持續，保守估計來貨價可下跌一成，由於每半個月至一個月他便會向供應商取貨，相信最快在四月中才能反映貨品實際價格。「價錢上未必會有好大嘅減幅，反而會着手入多啲唔同款式嘅貨，等客人多啲選擇。」他指，現時主要出售南韓牛肋骨及西冷為主，成本價下降後便會嘗試引入牛肩等其他部位。
港人重投南韓購物
新沙士去年襲韓，令南韓旅遊業大受打擊，韓圜下跌令不少港人重投南韓懷抱。東瀛遊執行董事禤國全表示，韓圜若跌幅持續，去年因新沙士而下跌的生意額，有望可增長，「港元兌唔同嘅貨幣都好抵，日、韓、台都多咗人去。」
另外，港人遊覽南韓亦可以在新匯率下受惠，八千韓圜的汗蒸幕由以往約六十港元，現時只需約五十三港元。而遊韓景點之一的景福宮，三千韓圜門票由過去約二十三港元，降至現時只需約二十元。
韓國觀光公社香港支社發言人表示，韓圜下跌吸引不少港人前往南韓購物，當中以化妝品、食物及衣服為主，加上春季櫻花季節，香港支社因而收到很多港人查詢。
圖／文：專案組