中環出更：葉劉覓得「高富帥」加盟青委會
新民黨主席葉劉淑儀向來崇優，黨員唔係尖子就係專業人士，轄下嘅青年委員會亦唔例外，好似剛上任青委會副主席嘅王政芝（Gigi），仲有盛傳參選九月立法會新界東選舉嘅「翻版吳綺莉」容海恩（Eunice）。最近青委會改選，葉太再引入「高富帥」副主席廖子聰（Michael)，一米八八身高，配合倫敦國王學院生物化學系學士學歷，加上從事人民幣外匯經紀，成個「package」已經冇得輸。
最近改選嘅新民黨青委會由執業會計師王家揚（Roland）接任主席，前晚率領六名副主席見傳媒。講起Michael呢位新丁可謂資深「沙田友」，笑言自細飲城門河水大，中學時代更曾入選沙田區藍球隊，同Eunice一樣都係透過公民力量入黨。
副主席粒粒皆「專」
除咗Michael，其他副主席好似葵涌醫院精神科醫生葉沛霖都粒粒皆「專」，Roland話近年各政黨都積極換血，青委會目標係幫葉太擴充現時約二百人嘅青委會規模。不過，佢哋個個「贏在起跑線」，發表意見時唔好咁離地至得喎！
卓妮