中環出更：才俊嘆青年創業多障礙
好多年輕人都話創業艱難，卓妮早前在稻苗學會新春團拜上見到叙福樓集團執董黃傑龍（Simon），佢話有年輕人曾經同佢訴苦，話開新公司時想開個銀行戶口都困難重重，令Simon諗起佢旗下每個唔同名的食肆都會開銀行戶口，但銀行每次都要佢哋畀好多文件才批核，半年先開到個銀行戶口真係平常事，佢咁有經驗都覺得繁複，何況係創業初哥？
Simon話，年輕人創業開銀行戶口，銀行除咗要求財務報表外，仲要佢哋提供與客戶嘅生意合約證明，但係對創業新手嚟講，未有戶口就先要有客戶合約都有一定難度，佢認為政府可以研究吓有咩方法放寬或提供協助，等年輕人創業之路少啲障礙。
鄭肇琪「一視同仁」立威信
不過，創業難守業更難，筲箕灣安利魚蛋粉麵後人鄭肇琪就分享當年讀完書應家人要求返舖頭幫手的經過，佢認為要保持競爭力，就要一改過往「拍膊頭」遲到早走的文化，無論對老師傅或年輕一輩員工都要一視同仁，咁先可以令人信服。
身旁Simon仲大爆早前幫襯安利有驚喜，因為鄭肇琪特製咗份「生日多」（鮮油奶多）畀佢做生日蛋糕，夠晒心思。至於鐵板超負責人盧有芬入行係因為有次睇唔過眼廚師煎魚太燶，自己決定學埋一份，點知愈學愈鍾意，最後入埋行添。
當晚出席團拜嘅除咗主席邱金榮外，仲有「幟哥」龍皇酒家飲食集團主席黃永幟及聯邦酒樓董事執行經理程少儀等。點解會咁遲先團拜？邱金榮解釋，通常飲食界都要先招呼晒啲客仔，過咗最忙嘅檔期後先可以輪到自己慶祝喎。
卓妮