公民講場：政總水簾洞 行政署靠賴

標榜「門常開」嘅金鐘政府總部落成唔夠五年，甩漏多多，未正式踏入雨季，尋日只係落咗場雨，政總東翼嘅簷篷已經招架唔住，雨水沿假天花嘅燈罩同閉路電視傾瀉而下，變咗「水簾洞」，閉路電視咁滲水法分分鐘報銷。不過，行政署其後回應，話係建築署人員維修檢查時打開咗簷篷頂蓋，但突然遇上大雨，檢查人員搵物料遮住頂部都抵擋唔到雨勢，強調漏水同建築物結構無關，事發位置附近裝置都冇損毀喎。政總係行政署負責，但有事發生就賴天氣、賴建築署，堂堂政總連一場雨都擋唔住，唔怪得咁容易被示威者衝擊喇！