政情：中氣不足 「珍」係要學粵曲
粵劇係非物質文化遺產，近年亦有好多小朋友同青少年學粵劇，原來保良局副主席郭羅桂珍都打算學粵劇。郭太尋日出席保良局首間零售社企開展禮時話，自覺中氣不足，都打算搵個師傅學粵曲練吓中氣。
郭太又話，細個一直冇機會學做大戲，但家人就會帶佢去睇粵劇，佢最鍾意就係任劍輝同白雪仙，因為覺得佢哋做得好入戲，閒時都會同丈夫莎莎國際主席郭少明拍住拖睇粵劇，只要有陳寶珠同龍劍笙就必睇，好彩識得啲朋友，唔驚買唔到飛。
新社企專賣粵劇禮品
今次保良局成立嘅社企叫做「伶345」，係一間粵劇禮品中心，位於一級歷史建築油麻地紅磚屋，保良局去年向康文署投得呢個項目。中心設計包括竹棚及虎度門等戲曲元素，亦邀請了本地手作人特別設計粵劇禮品喺中心寄賣，又會定期舉辦工作坊及交流活動，推廣戲曲文化。