政情：「忻」賞子女 拒做怪獸家長
近來接連有學生難抵學業壓力或排擠等，選擇自殺結束生命，父母同社會望子成龍對年輕人產生嘅巨大壓力再次引起關注。全國青聯副主席施榮忻（Jaime）自言從來唔會做怪獸家長，亦唔會要求仔女科科攞高分，仲自爆大女成績普通，但佢只求合格多幾分就得，仲講笑話讀唔成書最多返佢公司做茶水部，咁講反而警惕仔女唔好太懶散。
唔催谷 四歲細仔愛下廚
育有兩女一子嘅Jaime成日陪小朋友，只要有時間都會接細女放學，氹得囡囡好冧，佢同仔女都好friend，學業成績係次要，興趣班都係想學先畀佢哋學，唔會催谷，連四歲細仔鍾意下廚，Jaime都放心佢上堂學烹飪。不過，Jaime無意將生意交託畀仔女，因心痛仔女要飲酒應酬好傷身。Jaime為生意中港兩地走，經常要同生意夥伴飲酒應酬，雖然飲得兩杯，但希望仔女有自己一片天，叫佢哋做茶水都係靠嚇啫。