政情：電騙纏身 謝偉俊頭痕
騙徒手法層出不窮，假冒名人作宣傳，甚至作出種種不法行為，最慘就係被冒名嘅人士被連累到一身蟻。有「法律超人」之稱、本身係律師嘅立法會議員謝偉俊（Paul）近年受到懷疑被不法之徒冒名的困擾，疑捲入WhatsApp騙案。話說有人疑透過WhatsApp利用「謝偉俊」個名做生招牌去招攬他人辦事，Paul話，他已經受困擾幾個月，又唔明對方「葫蘆裏賣咩藥」，放蛇唔成功，報警又唔受理，束手無策。
「應急快錢」 又話非財務
近日流傳一個電話WhatsApp短訊，列明「$應急快錢$」，驟眼睇以為財務公司借錢廣告，但內容就寫上「先收錢後登記」，又講明「絕非色情非財務」，「全程二十八至三十六萬現金，即日收三至五萬訂金」，還提到「XXX、XXX、謝偉俊等律師樓合辦，信譽良好」添！短訊尾段仲提到「介紹朋友可抽佣（一萬至三萬）」，並留下查詢電話。睇完整個短訊，真係唔知「葫蘆裏賣咩藥」。
Paul就話，有關短訊唔似係借錢、放貸廣告，亦唔知係咪搵人搞掛名結婚，但他就完全被人冒名，強調無參與其中。他續稱，幾個月前已經知道有其他電話號碼、包括內地號碼發出類似短訊，四個月前報過一次警，上月亦報咗一次，但警方都以「唔夠料」為由不受理。為求找出真相，Paul亦試過叫義工「放蛇」，回覆電話表示有興趣參與，想了解多啲，並希望約見面，但對方就唔肯露面，似乎警覺性甚高。
困擾多月 已報告律師會
其實過去Paul已發現內地有人盜用其律師行標誌，估唔到今次被盜名宣傳發生喺香港。Paul慨嘆：「報警無用、放蛇又唔掂」，已經有好多人就類似短訊打電話畀佢問個究竟，惟有向對方解釋清楚與自己無關，他亦都將事件向香港律師會報告，以便行家知悉。不過，他最擔心係有人因為呢啲短訊中招、受騙，而唔識或唔敢去報警喎。如果真係有人因為Paul個名而受騙，不知法律超人如何為受害者伸張正義呢？